धानपीक करपले, कर्जाचा डोंगर कसा फेडायचा? ३६ वर्षीय शेतकऱ्याने संपविले जीवन…बळीराजा शेतकरी हा आत्महत्या करणे हे समाजाला परवडणार नाही…

गडचिरोली : शेतीसाठी घेतलेले कर्ज, अनियमित पावसामुळे धानपिकाचे झालेले नुकसान आणि कर्जाची परतफेड कशी करायची, या आर्थिक विवंचनेतून चामोर्शी तालुक्यातील भेंडाळा परिसरातील ३६ वर्षीय शेतकरी सचिन भाऊजी सातपूते यांनी आत्महत्या केल्याची दुर्दैवी घटना समोर आली आहे. स्वतःच्या शेतातील चिंचेच्या झाडाला गळफास घेऊन त्यांनी जीवन संपविल्याने परिसरात शोककळा पसरली आहे. या घटनेमुळे शेतकऱ्यांच्या वाढत्या आर्थिक अडचणी, कर्जबाजारीपणा आणि शेतीसमोरील अनिश्चिततेचा प्रश्न पुन्हा एकदा ऐरणीवर आला आहे.


प्राप्त माहितीनुसार, सचिन सातपूते हे घटनेच्या दिवशी सकाळी सुमारे आठ वाजताच्या सुमारास आपल्या शेतावर गेले होते. यंदाच्या हंगामात पावसाच्या अनियमिततेचा त्यांच्या शेतीला मोठा फटका बसला होता. पावसाअभावी शेतातील धानपीक करपून गेल्याने अपेक्षित उत्पादनाची आशा मावळली होती. वर्षभर कष्ट करूनही हातात उत्पन्न येण्याची शक्यता कमी झाल्याने त्यांच्या कुटुंबासमोर आर्थिक संकट उभे राहिले होते.